A
 A=FILASTROCCHE
A01 013Trénta, quaranta,
la pégura la canta.
La canta sül sentée,
la ciama ul pégurée.
Ul pégurée l'è nai a Roma
a truvà la sciura padróna.
La sciura padróna l'è in dala stala
a fagh ul lécc ala cavala.
La cavala l'è sü in granée
a cüntà quii pòch danée.
A ga manca un quatrin
tirigh la cua a l'asnin.
A02 107Din, din
la Madòna la va in giardin,
san Giüsèpp al fa sü ul lètt.
ul Bambinèll al va a tö l'aqua.
Pasa la banda cun la bandéra bianca.
Ti murusa bèla,
ti murusa brüta,
pésta la züca,
pésta la saa
cunt ul manich dal cügiaa.
A03 051Din, dun, campanùn,
tre tusann in sül balcùn,
vüna la fila, vüna la taia,
vüna la fa capéi da paia,
vüna la fa capéi da fiur,
quéla bèla la fa l'amur.
La fa l'amur cul sciavatin,
piza, piza ul candélin
Ul candélin al vör murì.
Piza la lüm e va a durmì.
Va a durmì süla muntagna
che gh'è sü la Zèpa cagna
La Zèpa Cagna la fa i cagnöö
dagan mia al Lisandröö.
Ul Lisandröö l'a fai la süpa
e la sèrva l'a mangiada tüta.
A04 130A, Bé, Cé, Dé
ul maèstru al gh'à i danéé,
ul mè pà nun ghe n'à
tö sü i libri e scapa a cà.
Se al ma dà una patöla
töi sü i libri e tòrni a scöla.
A05 254Orbo, òrbo, vurii un tuchét da pan?
no, no cara masèra, sum pién fin a dumàn.
Orbo, òrbo, vurii un bicér da vin?
No, no cara masèra, sum pién fina al cupìn.
Orbo, òrbo, vurii fa un balét cun mi?
SÌ, sì, cara masèra l'è quèl che cérchi mi.
A06 189Mam, gh'u fam.
Mangia ul scagn.
Ul scagn l'è dür.
Mangia ul mür.
Ul mür l'è fat.
Mangia ul rat.
Ul rat al cur.
Mangia l'amur.
L'amur al taca.
Mangia la caca.
La caca la spüza.
Mangiala tüta.
Métala un puu in dal sacucìn
e tégnala par duman matìn.
A07 127Una vòlta gh'era un ómm
che al pértégava pér e pómm.
Sum nai là par catan sü vüna,
al m'a dai una pértégada sül cüü.
Al m'a mandaa là in la strécéta
a catà sü i giand da rugula.
I giand da rugula ga iu dai al purcèll,
ul purcèll al m'a dai la sungia,
la sungia l'u daia al praa,
ul praa al m'a dai l'èrba,
l'èrba ga l'u daia ala vaca,
la vaca la m'a dai ul lacin,
ul lacin ga l'u dai ala masèra,
la masèra la m'a dai i crustitt,
i crustitt ga iu dai al muléta ,
ul muléta al m'a dai na baréta
piéna da mèrda séca.
A08 052La végia tuntóna
la bala e la sóna,
la va sül mercàa,
la cumpra la sàa.
La va in cantina,
la tira la spina.
La ved un üsèll,
la dis che l'è bèll.
La mangia un bucun,
la diis che l'è bun.
La mangia da tütt,
la diis che l'è müff.
A09 068Uno, due ,tre,
la Pepina la fa ul cafè.
La fa ul cafè cun la ciculata,
la Pepina l'è mèza mata.
Mata ti, mata mi
la Pepina la vör murì.
Lassa che la möra,
farém la cassa növa.
Növa nuvénta,
farem na cassa pénta,
pénta péntaia,
farém na cassa paia,
paia paiun
farém un bel puléntun.
A10 076Tòni Tòni dala vall,
ména föra ul tò cavall.
Ul cavall l'è senza bria,
ména fö la tua Maria.
La tua Maria l'a rótt un pè
ména fö ul tò tetè.
Ul tò tetè al gh'a la baréta róssa,
indüina cusè la cósta,
a la cósta quarant'ann
süla pòrta de Milan,
süla pòrta de Cremòna ,
indua sa bala, indua sa sóna,
indua sa pésta l'èrba bóna,
l'erba bóna l'è già péstada,
Catarina inamurada,
inamurada dal barbée,
töla, töla par miée,
Fa' sunà la trumbéta,
fa' sunà ul viulin,
fa' durmì ul mè bambin.
A11 054O Giuvanin dala baréta rossa
dimm un puu quant la ta cósta.
Cinquanta, cinquant'ann,
süla pòrta de Milan,
süla pòrta de Cremóna
indua sa vénd l'erba bóna
L'èrba bóna l'è già cumprada,
Caterina l'è inamurada.
inamurada dal barbée,
töla, töla par miée.
A12 188Trii fiö gha iéva
trii ia mantégnéva,
trii in cüna,
trii vistii da brüna,
trii sul campanín
che fan balà
la sciura Térésin.
Frin, frin.
A13 223L'éva sü sul cüü dal gèrlu
che 'l cantava cumè un mèrlu
ul mè umin pinin, ul mè umin pinin.
Cun na sgòrbia di fasöö
mi gh'u fai trii camisöö,
ul mè umin pinin, ul mè umin pinin.
Cun na föia d'insalata
mi gh'u fai calzun e pata,
ul mè umin pinin, ul mè umin pinin.
L'éva là sül fuguràa
i galin ma l'ann bécaa.
A14 138Una vòlta gh'éva una dòna
nunóna, bufóna bénéficutóna
che la gh'éva una vachina
nunina bénéficutina
che la fava tantu lacin
nónin, bufìn, bénéficutìn
e la météva in dala crédénza
nunénza, bénéficuténza.
A15 141Uno, due, tre
nanca ul Papa l'è mia ul rè,
e nanca ul rè l'è mia la piaza,
e nanca la piaza l'è mia ul dóm,
e nanca ul cutìn l'è mia ul cutùn,
e nanca ul cutùn l'è mia ul cutìn,
e nanca la stópa l'è mia ul lin,
e nanca ul lin l'è mia la stópa,
e nanca ul füs l'è mia la ròca,
e nanca la ròca l'è mia ul füs,
e nanca i vérz inn mia gambüs
e nanca i gambüs inn mia vérz ,
e nanca la pügnata l'è mia ul cuèrc,
e nanca ul cuèrc l'è mia pügnata,
e nanca ul can l'è mia la gata,
e nanca la gata l'è mia ul can,
e nanca incöö l'è mia duman,
e nanca duman l'è mia incöö,
e nanca la tèra l'è mia fasöö,
e nanca i fasöö inn mia la tèra,
e nanca la paas l'è mia la guèra,
e nanca la guèra l'è mia la paas,
e nanca Bartól l'è mia Tumàs,
e nanca Tumàs l'è mia Bartól,
e nanca l'ai l'è mia scigóll,
e nanca i scigóll inn mia l' ai,
e nanca i culzétt inn mia stivai,
e nanca i stivai inn mia culzétt,
e nanca ul diavul l'è mia ul fulétt,
e nanca ul fulétt l'è mia ul diavul,
e nanca ul masée l'è mia ul fitavul,
e nanca ul fitavul l'è mia ul masée,
e nanca ul ciapin l'è mia ul murnée,
e nanca ul murnée lè mia ul ciapin,
e nanca ul sòld l'è mia un sésin,
e nanca ul sésin l'è mia ul sòld,
ciapal là che l'è bèll còld.
A16 241Zin, zéta, zin, zèll
ti la vaca, mi ul védèll,
lasa pür che al möra
farém na cassa növa
növa nuvénta
cumè ul cüü dala pulénta
cumé ul cüü dal puléntin
lasa fö quéll bèll gatin.
A17 161Ul méi:
mi sum un bèll méiétt,
che in trii més sum vért e sécch.
Ul carlun:
tas, tas ti minghérlin,
che se ta taian mia sübit ta burlat föra dal burzin.
Ul furmentun:
tas, tas ti pulentún,
che t'ann tiraa sü da dó vòlt i calzún.
La ségra:
tas, tas, ti furmentún,
che ta féet la farina négra e ta gh'éet ul cò fai a trii cantun.
L'òrz:
tas, tas ti ségra lunghignana,
che par marüdà ga vör sés més e una sétimana.
La póma da tèra:
ti òrz ta sét un puu püsée bassétt,
ma ta gh'éet la spiga che spung da malédétt.
L'avéna:
da ti póma da tèra gh'è niènt da dì,
parchè t'è salvaa tanta gent dala fam in témp da guèra.
Ul furmént:
ti avéna ta see una bóna biada pal cavall,
ma lassa la früsta da part e tégn strénc i rédan in man.
Ul murnée:
ti furmént ta set multu prévidént,
ta procürat ul pan a tüta la gént.
Ul prestinée:
e ti murnée dala bianca farina,
pàspala cui man, ma ròbala migna.
Ul Signur:
e ti prestinée sfurna i béi pagnòtt,
lassai mia brüsà, ma che sian bén còtt.
La gént:
e ti, Signur, che ta sé ul nòst Créatùr,
bénédiss i nòst campagn:
che piangia ul fiöö in dala cüna,
ma cunt ul pan in man.
A18 120Ségra ségra paésana
ta stéét növ més in la campagna
e mi, che sum un bèll méiét
in trii més sum vérd e séch.
A19 032Duman l'è festa,
tütt i dònn cambian la vèsta,
e mi che sum un pòr fiöö
cambi nanca ul camisöö.
A20 249Lirun, lirun, capélétt
tré tusàn in un sachétt
ul sachétt l'è discüsii,
tré tusàn in un barìi.
Ul barìi l'è sénza fund
tré tusàn in sü pal munt.
Sü pal munt gh'è pién da spin,
tré tusàn sü un asnìn
ul asnìn al pétégiava,
tré tusàn che caragnàva,
caragnàvan dala pasiùn
che l'èva mòrt un bèl tusùn.
A21 250Suu, suu bénédétt
salta föra dal sachétt.
Ul sachétt l'è discüsii,
tüti i dònn in un badíi.
Ul badíi gh'a via un urégia,
tüti i dònn in una ségia,
ula sègia a caval dal munt,
ul munt l'è pién da spin,
tüti i dònn a cavàl d'un asnìn.
 B=RIME VARIE
B01 109Crapa pélada
bóca da sciatt
basléta urlada
da pèll da ratt.
B02 042Crapa Pélada la fa i turtéi
ga na dà mia ai sò frédéi.
I sò frédéi fann la fritada,
ga na dann mia a Crapa Pélada.
B03 136Zin zéta furbaséta,
cinq quatrìtt a fala mulà
fala mulà cun curtésia
bala bén, signora mia,
ciapa la scua e fala balà,
fala balà in capunèra,
fala balà in una quéi manéra.
B04 177In fund al mè giardin gh' è un pérséghin.
In scima al pérséghin a gh'è un üsélin,
al gh'a la péna dòra süla cua
chi gh'a la dòna bèla l'è mia sua.
B05 147Se gh'è sücèss?
S'è rótt la cana dal cèss.
B06 178Cinq e cinq dés
a ti la mèrda, a mi i scirés.
B07 159Ul mè pà, cumè mi,
a l'è nai, cumè mi,
al mércàa, cumè mi,
l'a cumprà, cumè mi,
un bèll asan, cumè ti.
B08 158L'è tua, l'è mia
l'è mòrta a l'umbria.
B09 077Erèm, bütèm,
salin, limun,
da frin, da frun
e la gamèla, tudésch
e péss.
B10 135Con lo zigo zago
salta föra ul mago
con la pipa in bóca,
l'a catà la cióca
e al pò piü fümà
e guai a chi la tóca.
B11 116Bisa, bisa, fa bindèll,
famal lungh e famal bèll
famal pö da trii culur,
bisa, bisa fà l'amur.
B12 007Vün, düü
la pèll dal cüü.
Trii, quatar
va al tèatar.
Cinq, sés
milanés.
Sètt, vòtt,
Paulòtt.
Nöf, dés,
va a fa scés.
Vündas, dódas,
va a scundas
B13 029Sant'Antoni dal purcèll
al sunava ul campanèll,
ul campanèll al s'è rumpüü,
Sant'Antoni al s'è scundüü.
Al s'è scundüü dadré dala pòrta,
gh'éva là una dòna mòrta
che la fai ciuíi ciuíi
Sant'Antoni al s'è stremíi.
B14 041Lavur al pòrta danéé
Natal al pòrta beléé,
e mi che sum un pòr fiöö
a gh'u nanca ul camisöö.
B15 006Gh'éva una volta un ómm,
che al pérava i pér e i pómm
e al ménava la caréta,
e al pérdéva la buléta.
B16 046Albur, albur témpuriv
bürligh adòss a quii cativ
quii cativ nun ga n'è
bürligh adòss a quii che gh'è.
B17 010Camisöö cürt, cürt, cürt,
sa véd i ciap, ciap, ciap.
B18 253Ciribiribin castégn e nus
la mia mam la gh'a un bèl tus
un bèl tus cunt i curài
Ciribiribin castégn e ai.
B19 025Tòch tòch: - Chi l'è? -
- Sum quéll da l'altru dì
che al m'a dii da vegnì chi. -
- Cumè la sa ciama la sua mamm? -
- Maria -
- Anca la mia. -
- E ul sò pà ? -
- Giosuè. -
- Anca ul mè. -
- Emm da fà una bèla ghignada
mi e la Maria, mia cügnada. -
B20 207Guardívas bén da spung cun un gügin
quii che gira inturnu al campanin
préparévas a scapà
parchè i àspas va vöran cagnà.
B21 185I tré rarità dal mund:
i fung ai nassan sénza suménai,
ul ciél al sta sü sénza puntèll,
ul böcc dal cüü al sa stréng sénza bindèll.
B22 216Surèla se ga n'è in dala scudèla,
cüsin se ga n'è in dal burzin,
parént se ga n'è dént,
cügnàa se ga n'è in dal bucàa.
B23 218Sum bèla, sum brüta
süi mè zòcur ga stu tüta
e se an vanzi un tuchétin
gh'al du al mè bèl murétin.
B24 122La paiéta la fa ul paiéé,
ul lói al impiéniss ul stéé,
la véscia la pòrta alégria,
valza la gamba e pòrtala via.
B25 237Na vòlta gh'éva un óm e na dòna
inn nai sü pa na póma
gh'è nai sü un muscun in dal cüü
inn bürlàa gió tütt e düü.
B26 191O pà végn a cà
che l'è l'ura da disnà
che sunàa la campanèla,
gh'è scapàa la pulastrèla,
L'è scapada gió in di bósch,
l'ann mangiada tütt i mósch.
B27 039Stamatina sum nai a cagà,
n'u sbatüü da chi e da là,
l'u tucada cun la manina,
l'eva mòla, murisina,
l'eva pròpi spüzulenta:
mi sum föra, ti sét denta.
B28 034Trapulin che cata i ratt
cata dénta i uregiatt.
Catai dént a düü a düü,
catai dént par la pèll dal cüü.
B29 137Trapulìn da catà i rat,
sédélin da mung i vach.
A cà mia fu cumè vöi
cun la möia pizi ul fögh,
pizi ul fögh par fà la scéna
gh'an du mia a Madaléna.
 C=RIME MESTIERI
C01 201Lünédì lirun lirèla,
martédì gh'è quést e quéla
mèrculédì san Rafaèl,
giuvédì san Matìa,
vénérdì san Déféndént,
riva ul sabat che émm fai niént.
C02 011Chichirincöö,
la dòna dal capmastru l'è sénza lénzöö.
E mi che sum un pòr fiöö
a gh'u nanca ul camisöö.
C03 235Fra Francésch, fra Francésch
gh'è chi na végia da cunfésà.
Diségh pür che la naga via
che mi da vécc an cunfèsi mia.
Fra Francésch, fra Francésch
gh'è na giuvina da cunfésà.
Diségh pür che la végna avanti
che mi da giuvin an cunfèsi tanti.
C04 131Incöö l'è l'ültim dì
duman l'è la parténza.
I maèstri rèstan sénza
farém la rivérénza
ai asan che rèstan chi.
Incöö l'è l'ültim dì,
duman l'è la parténza.
Ciau murusa téncia
a scöla végni pü.
L'è l'ura da fa cur
maèstru e dirétur
e se l'è mia asée
bidèl e sua miée.
C05 245La murnèra l'a gh'a trii gòss,
vün l'è pinin e l'altru l'è gròss,
l'altru al tóca tèra
viva viva la murnèra.
C06 196O murnée a cà dal diavul
cum'è ta stée?
Nè stu bée nè maa
par la farina che t'u rubaa:
un quintal da gran:
vutanta a tüti,
nuvanta a quaidügn
e cént a nissügn.
C07 128O tusann gh'è scià ul magnan
cun la bulgia in süi spall,
ul bufétt dadré dal cüü,
o Chichina l'è pròpi lüü.
C08 234O tusann, gh'è chi ul muléta
se gh'avii 'na furbaséta
che ga manca una stachéta
ul ciudin gh'al méti mi.
C09 062Sciur dutur dala mèrdisina
quand al caga al fa dutrina,
quand al pisa sóna i ur
rivérisi sciur dutur.
C10 233Sciur dutur rivérisi
quand al védi ma strémisi
quand al védi da luntan
ma strémisi cumè un can.
C11 132Ul mè pà al fa ul muléta
e mi fu ul mulétin,
ul mè pà al ciapa i sòldi
e a mi nanca un quatrìn.
C12 171Ul prèvat al viv da carna mòrta,
ul dutur da carna marada,
l'avucàt da carna rabiada.
C13 231Mastru impiastru
stópa böcc,
maza piöcc.
C14 263Ul mè pà al fa ul mulèta
mi fò ul mulétin
quand morirà mio padre
farò ul muléta mi.
C15 232Magnan da tòla,
pésta la mòla
pésta ul ram
crépa da fam.
C16 026Ul cürat d'Albiöö
l'a fai tré brént da vin
dumà cunt i pinciröö.
 D=RIME ANIMALI
D01 061Al piöv
la galina la fa l'öv.
Al fiòca,
la galina la fa l'òca.
Al fiòca ala muntagna,
riva riva ul re da Spagna.
Ul re da Spagna, l'impéradur
rivérisi sciur dutur.
D02 036Al piöv
la galina la fa l'öv,
ul minin al lava i pagn
e la gata la fa i ésam.
D03 111Liga la vaca a la mangiadura,
ligàla bén che la sa strangura,
ligàla bén o paisàn
din don dan.
D04 113Légura, légura batt a scund,
va in dal pòst da l'altru mund.
Quand ul can l'è indurméntàa
légura, légura va a scapà.
D05 160La puntina la fa trenta öv:
dés i a mangia,
dés i a cuva,
dés i a tégn par l'anima sua.
D06 221Fiòca, fiòca,
i lüf i végnan in gió
e ai óman cun la barba
ga tréma ul pinciröö.
D07 210La vaca la va in Cércèra
la tira ul cüü par tèra,
la mangia i póm da tèra.
 E=RIME NOMI
E01 213Andrea,
al pica la préa
al pica ul sass
al fa diventà matt.
E02 220Tòni Tòni bigulòtt
léva sü a mèzanòtt,
léva sü e piza ul lüm
che la pulénta la spüza da füm.
E03 009Din, dèla
gh'è mòrt ul Paciunèla.
L'è mòrt a l'ustéria.
Duman la métan via.
E04 242Carlu, Carlu ména cüü
quanti ann ta séet nasüü?
Sum nasüü in riva al lagh
Carlu, Carlu tira ul spagh.
E05 056Caterina di curai
léva sü che canta i gai,
léva sü che l'è matina
Léva sü o Caterina.
E06 044Cara Angiulina végn gió da bass
che mi l'è un'ura che sum chi,
e se ta vörat mia végnì gió,
büta gió, büta gió.
E07 043Térésa burghésa
l'a fai trii pitt in gésa.
Ul ségrista l'a sentüü.
Al gh'a dai una pésciada in dal cüü.
E08 102Lüis barbis
grana da ris,
grana da saa
Lüis péstàa.
E09 209Lüis barbis
cun trè camis,
cun tré sciavatt
Lüis sbarbatt.
E10 156Lüisa barbisa
trii pülas in camisa:
vün al canta, vün al béca,
vün al sóna la trumbéta.
E11 038Céch, Céch
cornu béch
cornu vaca
Céch buascia.
E12 124Marghérita, trita trita
düü bastùn in sü la vita,
vün da scià, vün da là
Marghérita salta in cà.
E13 219La Mariana la va in campagna
cun ul gèrlu e la cavagna
cul séghèzz dadré dal cüü
ia fa sü a düü a düü.
E14 112La Mariana la va in campagna
cun la sapa e la cavagna,
quand ul suu al tramuntarà
la Mariana la végn a cà.
E15 078Maria,
a tucàla la cria.
A tucàla sül biótt
la dis nagótt.
E16 101Vitòria mémòria
suménza da galétt
par cumpagnà Vitòria
ga vör un bèl umétt.
E17 244Antònia, Pulònia
parchè ta balat piü?
Parchè gh'u rótt la vèsta
e sa véd tütt ul mè cüü.
E18 212Ghita ghitara
la sóna la fanfara
la sóna ul viulin,
Ghita, Ghitin.
E19 030Pédru, Pédru,
gamba da védru,
gamba da strasc,
Pédru butasc.
E20 110Térésina ala finèstra
fa sü i rizz e canélòtt
pasa via ul sò amante
Térésin fai sü pü
parchè mi ga n'u un'altra
e a ti ga pénsi pü.
U giràà tütt i cuntrad
u giràà tütt i paés
u giràà tütt i cità,
ma bèla cumè ti
n'u pü pudüü truvà.
E21 060Gh'eva una vòlta
Pedru al sa vòlta,
Pedru al sa gira
al tröva una lira.
Al va süla scara
Pedru al sa mara.
Al tröva un fasöö,
Pedru al gh'a un fiöö.
Al ciapa la cióca
Pedru al sa cópa.
E22 053Ninin, ninan,
l'è mòrt un can,
un can rabius,
gh'è mòrt un tus,
un tus pinin
cumè un lazarin.
Lazarin mòla ul curtèl
piza ul fögh sül castèl
ul castèl l'è tròpp in sü,
la piza indua che 'l vör lü.
E23 240Dulin, dulan
gh'è mòrt un can
un can rabius,
gh'è mòrt un tus
un tus tudésch
al gh'a in nóm Francésch.
E24 199Ruland, prédicant
cunt ul burzin in scarzèla
l'a mangiàa una galina
mèza crüda, mèza còta,
in dal véntru la barbòta.
E25 175Tógn, Tógn
péla pómm,
péla figh,
capitani di furmigh,
capitani dala guèra
ciapa ul s'ciòpp e burla in tèra.
E26 243Tógn, Tógn
péla rógn
péla figh
capitani di furmigh
capitani dala guèra,
mangia pan e dòrma in tèra.
E27 085Din don Lüzia,
l'è sóta al gabinòtt,
gh'è sótt la vegia stria
che fà balà i pigòzz.
E28 251Batista butasc
una lira da quacc,
Batista batént
una lira d'argént.
Batista fila la rista
fila la stópa
dagh sü la maza
in sü la cópa.
E29 252Carlo, Carlo sciatarèll
che ga pias i tusan bèll
i tusàn béi inn mia matt
da töö ul Carlo cumè un sciàtt.
E31 275O Giuvanin scérpulin
cun la pipa sóta al nas,
la pulénta la ga pias
la ga pias cun la patata
cich e ciach su la culata.
 F=RIME PAESI
F01 225I tusan da Mücc
i van in pumpa,
portan i calzétt
cun rótt la giunta,
i pòrtan i scarpétt
cun rótt la söla,
i cércan i murus
e nu i a trövan.
F02 183Bésasc, pumpastrasc,
Réncaa goss,
Généstré, ranàt
Ligurnétt, bighitt.
F03 099I tusann da Généstré
vann in gésa a tré a tré,
tócan nanca l'aqua santa
par ciapà la prima banca.
F04 037I bighitt da Ligurnétt
fan sü i rizz cunt ul bachétt,
ul bachétt al s'è rumpüü,
i bighitt a s'énn perdüü.
F05 100Quii da Civ inn sasaréi,
quii da san Pédru mataréi,
quii da Stabiu lapazüch
quii da Ligurnétt i püssé brütt.
F06 179A sant'Antòni da Généstré
vann i béi tusann a fass védé.
I mè inn brütt e ai tegni a cà
ai ménarù a quéll da Sulbià.
F07 206Ala matina péradèll,
a mésdì brüsadèll,
ala sira téti farü
a Mücc végni pü.
F08 246I tusànn da Ligurnét
fan sü i rizz cun un bachét
ul bachét al s'è rumpüü
i tusànn i an piangiüü.
 G=SAGRE/CALENDARIO
G01 121Sant'Antoni al m'a dai un póm,
sant'Ambrös m'a l'a fai cös,
Dénédàa ma l'a péràa,
Carnévàa ma l'a mangiàa.
G02 170Ul san Manfré
par basàll bisögna passà dadré.
G03 148Risòtt
capùn
panatùn
vin bun
din dun.
G04 033Carnévaa l'a rótt ul cò,
damal a mi che al giüstarò
cun la gügia e ul didaa:
viva viva Carnévaa.
G05 098Carnévaa l'è un óm da bén
cunt i còrni al vòlta ul fén.
Al vòlta ul fén e la méaca,
carnévaa l'è una baraca.
G06 214L'ültim dì da carnévàa
ul purcèll al va cupàa
sia gròss sia pinin
fém sü salam e salamin.
G07 180Duvè nii tusann?
A San Martin.
Duvè nii tusann?
A Santa Pulònia.
G08 015Sant' Andrea, bóia i can,
tòrna a cà i maéstran.
Tòrnan a cà a düü a düü
cunt i pèzz dadré dal cüü,
cunt in tèsta un gran capèll
cun nagótt in di scarzèll.
G09 126Par san Simun e Giüda
strépa la rava che l'è maruda,
o marüda o da marüdà
strépa la rava e portala a cà.
G10 008Din, don, dan,
Santa Lüzia l'è dòpuduman
a l'è ul dì dala nosta fèsta,
né gh'ém pan, né gh'ém minèstra
né gh'ém pan, né gh'ém fasöö;
o che imbrói cun sti fiöö.
G11 079Santa Lüzia bénédéta
végnum sü a tö la michéta
e cul sun di tò campan
cantarém fina a duman.
G11 192Din, don,
campàn da Com.
Din dan,
campan da Milan.
G16 190Piva, piva, l'òli d'uliva,
piva, piva, è nato Gesù.
L'è ul Bambìn che pòrta i bélée,
l'è la mam che spénd i danée.
G19 050Din, don, dan,
santa Lüzia l'è dòpudumàn
o cun pan o sénza pan
santa Lüzia la fém dumàn,
o cun crich o sénza crich
santa Lüzia la fém da scich.
G20 058Piva, piva
l'òli d'uliva.
Gnaca, gnaca
l'òli che taca.
L'a mangià trii böö e na vaca
e na scòrba da scigóll,
piva, piva, l'è mai ségóll.
G21 117Santa Lüzia di ugiùn,
sant'Antòni di bumbùn,
san Giüsèpp dal magun,
santa Pulònia di caragnùn.
 H=PREGHIERE
H02 239Avemaria pal nost Signur
che l'è mòrt in sü la crus
sóta la crus gh'è la Madòna.
La Madòna l'è naia in cél
a truvà ul so Michée.
Ul sò Michée l'è crucéfiss
Avemaria pal paradis.
In paradis gh'è tütt i Sant
Avemaria per tütt e quant.
H03 260Canta, canta rosa in fiur
gh'è nasü nostro Signur
l'è nasü a Betlèm
tra un bò e un asinèll
cun né fassa nè mantèll
da fasà Gesü bèll.
Gesü bèll, Gésü Maria
cunt i angiar in cumpagnia.
Chi la sà e chi la dis
ga darà ul Paradìs.
Chi la sà e chi la canta
ga darà la gloria santa.
H04 017Ròsa, ròsa, santa Chiara,
impréstim la vòsta scara,
la scara da nà sü in paradis
a truvà san Diunis.
Sant Diunis l'è bèl e mòrt
e nisün ga fai ul còrp.
In cél e in tèra al lüsirà
e un quéi vün la cüntarà.
Chi la sa e chi la dis
naran drizz in Paradis
e chi mia la cumprénd
ul dì dal giüdizi
sa truvaran pòch cuntént.
H05 059Santa Chiara
impréstém la vòssa scara
par andà in Paradìs
a truvà san Diunìs.
San Diunìs l'è bèl e mòrt
a gh'è nisün che ga fa ul còrp
Bèla préda, bèl altar
tütt i méss saran cantàa,
saran cantàa in süla Crus,
e la Crus l'éva tantu bèla,
la lüsiva in cél e in tèra.
In cél e in tèra la lüsirà,
cinque piaghe la mostrérà.
Chi la sa e chi la dis
andaran in Paradìs.
Chi non la sa e non la dis
ul dì dal giüdizi
sa trövaran péntìi.
H06 083O Madona mia va salüdi
quand passi da quésta via
e va racumandi l'anima mia.
H07 166Signur cürum,
mi, la mia mamm, ul mè pà
e tüti i gént dala mia cà.
H08 248O Signur ta presenti
quèsti pòch Patèr,
quésti pòch Avémarì
a unur e glòria da Dio.
Madòna santissima,
Angeli Custòdi,
tütti i Sant,
tütti i nòst pòri mòrt.
Signur cürum,
Madòna vütum
di péricui da l'anima e dal còrp
fina al punt dala mia mòrt.
H09 027Aqua santa che ma bagna,
Spirit Sant che ma cumpagna,
al ma cumpagna nòtt e dì
brüta béstia, via da chì.
Ul Signur e la Madona
végnaran sémpru cun mi.
H10 224Anima mia bütas gió
guarda in cél che gh'è Gesü.
Ama chi ti ama,
lassa ul mund che ta ingana.
Pénsa che ti é da murì
e ul tò còrp l'a da marcì.
Mi vu in lètt
cun la crus al pètt,
la mòrt ala góla
e ul Signur che ma cunsóla.
Sant'Ana, santa Susana
vüna la ma diséda,
l'altra la ma ciama.
H12 018O Signur,
mi ma büti gió
e al su mia se scamparó
e l'anima mia a chi la daró?
Al Signur,
ala béata Vérgin Maria
a san Michéé Arcangél,
che ma la guarda e la cunsèrva
fina al punt dala vita étèrna.
H13 080Sant'Ana e santa Giüliana
vüna che la ma deséda
l'altra che la ma ciama
al prim tóch dala campana.
H14 082Signur va ringrazi
da tanti grazi ricévüü
in sta giurnada bénédéta
in santa paas, bóna nòtt in santità,
in grazia vòsta.
Signur cürém,
salvém da tüti i péricui
da l'anima e dal còrp.
H15 259Madòna mi vu in lécc
trii angér che ma spécia:
trii da pè, trii da cò
e 'l Signur in mèz
e 'l Signur al savarì
bona cüra ma farì
Aqua santa che ma bagna
Spiritu Sant che ma cumpàgna
Brüta béstia via da chì.
H16 081Sant'Antoni dai trédas grazi al dì
déman dó anca a mi:
vüna da bén viv
e vüna da murì
in grazia di Dio.
H17 134Santa Barbara e san Simun
cürém dal stralüsc e dal trun,
dal fögh e dala fiama
e dala mòrt sübitanea.
 I=RIME RELIGIOSE SCHERZOSE
I01 264Avémaria, grazia pléna
a lavurà ma fa maa la schéna.
I02 157Dominus vobiscum
l'è scapà e non l'ho più visto,
l'è scapà in sacristia
a fà l'amur cun la Maria,
e ul diavul l'hà purtàa via.
I03 203Giüdée traditur
spüda in facia al Signur
spüda in facia ala Madòna
o Giüdée sénza vergógna.
I04 065O Gesü d'amur acés
bütum giò un bigliétt da dés.
O mè caru e bun Gesü
mi sum chi a catál sü.
I05 162Orate fratres, tütt par mè
e pai altri se ga n'è.
I06 064Patèr nustèer,
gamba da fèr,
gamba da légn,
tira che al végn
gamba da ram,
patèr nustran.
I07 066Santa Maria
grazia piena,
poch da disnà
ménu da scéna.
I08 165Santa Maria Mater Dei
sü pai munt a catàa giustréi,
n'u catàa na cavagna piéna
santa Maria Madaléna.
I09 167Signur ta ringrazi
da véss crésüü
da scià dal dazi.
I10 149Tantum ergo sacraméntu
canta i mèrli sül furméntu.
I11 143Te rogamus sent la vus
tré lüganigh e un sach de nús
I12 168Tüti i dì préghi ul Signur
da tégnì luntan avucat e dutur.
I13 164Santa Lüzia di ugiün
démal prést e démal bun.
I14 086La Madona da Caravazz
l'è vistida da marazz,
l'è vistida da cutun
la Madona da san Simun.
I15 142Dies irae, dies illa
inn tütt asan quii da Villa,
spécialment quii da Culdréé
inn tütt asan drizàà in péé.
 L=INVOCAZIONI
L01 087Cara Madunina dal Castèl
fam truvà l'óm bun e bèl
e ti, san Ròch
fam mia truvà un marturòt.
L02 205Diu ta guarda
dala füria dal vént,
dal frà föra dal cunvént,
dala dòna che parla latìn,
dal om che bév tropp vin.
L03 227O Signur,
la vita e l'unur,
danéé da spend,
un umétin arént,
ul Paradis in stu mund
e in quél altru.
O Signur
va dumandi niént altru.
L04 084O Signur
mi sum ul vost Togn,
vü savii se gh'u da bisögn:
un tòch da pan,
un piatt da minèstra
e un quei franchétt par la fèsta.
L05 019Sant Antòni dala barba bianca
fam truvà quel che ma manca.
L06 016San Bastian,
cürum di can rabius
e anca di biss vélénus,
di sass péndént
e dala cativa gént.
L07 204Sant'Antòni glurius
fam la grazia da truvà un bun spus
che al sia fiöö d'una brava dòna,
che al gh' abia pan e una pusiziun bóna,
un piatt da minèstra,
un pulastru ala fèsta,
ul burzin pién e ul cör cuntént.
Sant'Antòni va dumandi pü niént.
 N=INDOVINELLI
N01 230A gh'è una végia
che la gh'a dumà un dénc
e la ciama tüta la gént.

La campana
N02 154La va gió ridént,
la végn sü piangént.

Il secchio nel pozzo
N03 155Chi ga l'a in man
la tira.

la corda della campana
N04 152A l'óm al ga dundóla
la dòna ga la régóla

Il bottone
N05 215Sciüscia, mira,
cascial in dal böcc e pö tira.

il filo nell'ago
N06 153Dal dì i fann tèch tèch,
da nòcc inn sóta al lètt.

le zoccole
N07 266Inn quatru surèl,
i curàn, i curàn,
sa càtan mai.

le ruote
N08 228Ass da sura
ass da sóta
ass da scià
ass da là
e carna frégia in mèzz.

cassa da morto
N09 194Al va dénta pién
al végn föra vöi.

il cucchiaio
N10 193Gh'è una ròba
che püsséé l'è calda
püsséé l'è frésca.

il pane
N11 229Pulvura gialda
aqua séréna
tacad tütt inséma.

polenta
N12 106La trévèrza la piana
sénza lasà pédana.

luna
N13 105In cél la gh'è,
in tèra no,
i pupòll ga l'ann,
i dònn no.
Lüzia ga l'a danànz,
e Gabrièl dadré

la lettera L
N14 090Gh'è un s'ciupétt
fai par caas.
Al mira al calcagn
pö al cata ul naas.

peto
N15 089Al nass, al canta e al mör.

peto
N16 273La va, la va
la tira dré la cà.

lumaca
N17 104Sóta al punt di cich e ciach
a gh'è sóta barlich e barlach
tütt vistii da vérdisin
chi la indüvina l'è un induvin.

ramarro
N18 267Al va dénta négar
al végn föra bianc.

prete
 O=CANZONI
O01 057Carulin fa ul lacc, cc, cc
tri bidun par pécc, cc, cc
pari i pòri vecc, cc, cc
dala val da Mücc, cc, cc.
O02 200Oh mama mia la spusa l'è chì
fém alégria che incöö l'è ul sò dì,
l'è ul sò dì, l'è ul sò mumént
fém alégria che mò l'è ul sò témp.
O03 075Oh pà vegn a cà
che l'è ura da disnà,
gh'è sunàa la campanèla,
gh'è scapàa la pulastrèla ,
l'è scapada sü in granéé,
l'a purtà via tütt i danéé.
O04 028Ul Barbapédana al gh'éva un gilè
lungh dananz e cürt dadré.
L'éva lungh püséé d'una spana
l'éva ul gilè dal Barbapédana.
O05 125O Giuvanin campagna
cunt i calzùn da lana
cunt i calzùn da frisa,
ta sunarém la piva
e balarém un pò.
Balarém, lirun lirèla
balarém lirùn lirà.
L'è nai dénta in dala scuèla,
l'a ciapà l'ümidità,
quà quà.
O06 005Panighiröla végn da bass,
che da sura tiran i sass,
che da sóta fan la guèra,
panighiröla végn gió in tèra.
 P=STORIELLE
P01 198Bufétt
bófa pian, bófa fòrt,
bófum in dal cü
quand sum mòrt.
P02 208Céch, lassandu un umbrélée
al sa incuntra cun Michèe
- Cume la va? -
- Ben mi, e tì? -
- Vét in piaza? Végni anca mì! -
Sa cumpagnan alégramént
via, in mèz a tanta gént.
Tütt un bòt un nüvulun
al tempèsta gió gutun.
- Vèrd l'umbrèla! - Michée al dis.
Tütt a un tratt ul caru amis!
Ma rispund ul Céch
- Oh dèss
l'u cumprada apéna adèss! -
P03 182Düü dì inn mè
vün dal mè cumpar febré,
bianca che ta sét,
négra ta divéntarét.
 Q=SCIOGLILINGUA
Q01 258Sura al campanìn dala Cirabiciacula
gh'era sü 555 Cirabiciaculit
e quand la Cirabiciacula la cirabiciaculava
tüti i 555 Cirabiciaculit i cirabiciaculavan.
Q02 261L'oli l'è lì
l'ola l'è là
g'a la lì lü la lüm.
Q03 103Tacum i tach!
Mi tacat i tach a tì?
Tacat tì i tò tach,
tì che ti tacat i tach.
Q04 094O quel óm süla pipa
cun la pòrta in bóca
l'a mia vist da sta galina
pasà la mia cuntrada.
Sum tantu pérdüda
d'avéla rabiada
parchè la fava i pügn
gròss cume öv.
Se la mazi la cati.
Q05 095O quel óm süla pòrta
cun la pipa in bóca,
l'a mia vist in sta cuntrada
pasà la mia galina?
Sum tantu rabiàda
d'avéla perdüda
parchè la faséva i öv
gròss cumè un pügn.
Se la cati, la mazi.
 R=SENTENZE
R01 096Se la végn da san Maféé
tö sü la sapa e mòla i péé,
Se la végn da sant'Elia
tütt i cà ia ména via.
Se la végn da Com
l'è nanca aséé da lavà i póm.
Se la végn da Lügan
l'è nanca aséé da lavà i man.
R02 176I miracui ia fann i sant
e i tusann quand inn grand.
R03 108Léé la dis, la ga, la ga
la ga ul lécc in spazacà
la ga ul cümò cun la lécèra
tra ul cifùn e la capunèra.
R04 047La dòna pulidina
la fa ul lécc ala matina.
La dòna inscì inscì
la fa sü a méscdì.
La dòna purcélénta
la fa sü ul lécc quand la va dénta.
R05 169Tüti i més
al fa la lüna
e tüti i dì sa na impara vüna.
R06 097Nà in lécc par lévà sü,
trà fö i pagn par métai sü,
trai fö cald, métai sü frécc
lévà sü par turnà in lécc.
R07 150San Giuvànn
al fa mia d'ingann.
R08 031L'è dala cumpagnia da sant'Andrea,
gh'è scapaa la vöia, gh'è restaa l'idea.
R08 174Un veru bécch
al ga da véss magru e sécch.
 S=NINNE NANNE
S01 073Din, din campanin,
la Madona la va in giardin,
san Giüsepp al fa sü ul lètt.
La Madona la fila la lana,
ul Bambin al fa la nana.
S02 074Fa' la nana pupòo bèll
che in stala gh'è vaca e vedèll,
gh'è la pégura cul pégurin,
la purcèla cul purcélin,
gh'è la pita cui puiöö,
e la mam cul sò fiöö.
S03 045Dormi, dormi bèl bambin
pién da vin fina al cupin.
S04 238Fa nanin pupin da cüna
che ul tò pa al patiss la lüna
la patiss un puu da spéss
fa nanina pupin da gèss.
S05 217Frédèl da quél da Castèl
cüsin da quél da Salurin
cügnàa da quél da Réncàa
amis da quél da Méndris.
 T=CONTE
T01 069La Madona da Varés
la cüntava fina al dés:
vün, düü, trii, quatar, cinq, sés,
sett, vòtt, növ, dés.
T02 070Rundinèla che végn dal mar,
quanti pénn la pò purtà,
a na porta tréntatrè:
uno, due ,tre,
a chi tóca, tóca a tè.
T03 067Pan vün,
pan düü,
pan trii,
pan quatar,
pan cinq,
pan sés,
pan sètt,
pan vòtt,
pancòtt.
Ti ta set sótt.
T04 118Ailì, ailé
che ta blusé,
che ta musé
che ta prufita lusinghé
tulimlèm blèm blèm
tulilèm blèm blu.
T05 071Zin, zéta , furbaséta,
trii quatritt, la mia calzéta.
La mia gata la vör murì,
ga farém la scòrba bóna
bóna, bunénta,
cul pariöö dala pulénta.
Uno, due, tre,
a chi tóca, tóca a tè.
T06 001Pin, pin, cavalin
sotà ai pè dal péstonin
pan pòss, pan frèsc
indüvina che l'è quést.
T07 072Cilipp, cilapp,
l'è tua, l'è mia,
l'é quela del gatt,
cilipp, cilapp.
 U=GIOCHI
U01 014Ugin bèl,
ul sò frédèl,
Urégina bèla,
la sua surèla.
Bóca di frà.
Campanin da sunà,
Din, din, din.
U02 091Cervèl,
barbèl,
butun,
pistòla,
canun.
U03 093G'u fam.
Ném a rubà.
Sa fa pécàa.
Va là in dal crédénzin
che gh'è dénta un bèl michin.
Damal a mi,
che sum ul püséé pinin.
U04 092Quést chi l'è bürlaa gió,`
quést chi l'a catàa sü,
quést chi l'a métüü in nana
quést chi al ga fai la süpa
e quést chi l'a mangiada tüta.
U05 145Quést l'è ul mazapiöcc
quést l'è ul lécasquèll
quést l'è ul did da mèzz
quést l'è ul spusin
quést l'è ul paspagalìn
U06 144Tròta, tròta scimbiöö
che duman farém fasöö
dopudmàn farém lasagn
maridém i nòst tusan.
U07 002Tròtt, tròtt, cavalòtt,
quél che l'è sü l'è un bèl gagiòtt,
quél che lè gió l'è un tròtapian,
andarém fina a Milan.
U08 222Tric troc cavalòt
sü e gió da scima ai mòtt,
bun pan, bun vin,
fa trutàa ul mè cavalin,
fal trutà a pas a pas
fin che al tröva da spusas.
U09 123Salta Miranda
rump una gamba
rump un dit,
salta, salta in Paradis.
U10 035Minin gatin
indua sét nai?
Dala daza.
Se la ta dai?
Pan e furmai.
Parchè ta l'et mia dai a mì?
Tic e tic e tic e tì.
U11 003Lümaga, lümagòra,
cascia föra i còrni,
che gh'è scià quii da Ligòrni,
cun la sapa e cul badì
che ta vöran sépélì.
U12 247Cucù cucù bèl
quanti an che ma manca
da mét sü l'anèl?
U13 063O cucù dala barba bianca
quanti ann ta vö che scampa?
U14 004Puian, puianèl
fa la röda sül castèl,
fala da scià,
fala da là,
ma mia sura di mè cà.
U15 236Gri, gri végn arént
che végn ul tò pa
cun na squèla da furmént.
U16 146Parchè?
Parchè la gamba l'è tacada al pè
e ul pè l'è tacaà ala gamba,
tütt i asan ai dumandan.
U17 139Ta vöt una póma?
Tò!
U18 048Man, man mòrta
pica la pòrta
pica ul purtun,
pica gió in sül crapun.
U19 186Vèrd la bóca e sèra i öcc.
U20 181l'òli,
l'asé,
la saa,
ul pévar
e... l'ai!
U21 256Fögh, fögh mi ta dù un dénc frücc
e ti ta ma dét vün növ, bèl e san
che al pòda dürà cént ann.
U22 151Crusin cruséta
giürìn giüréta.
U23 133Cucù, cucù bèll
quanti ann ma manca
par métt sü l'anèll?
Cucù, cucù mimì
quanti ann manca
par duvé murì?
U24 187Papagal fa sü i rizitt.
U25 049Mamm, gh'u fam.
Mangia ul scagn.
Ul scagn l'è dür.
Mangia ul mür.
Ul mür l'è fatt.
Mangia ul ratt.
Ul ratt al cur.
Mangia l'amuur.
L'amuur l'è fata.
Mangia la caca.
La caca la spüza.
Mangiala tüta.
U26 272Adès ta cünti na storia,
lunga, lunga, lunga.
Quésto chi l'è ul did
e quésta chi l'è l'ungia.
U27 271Lüna, lüna fa i gnòch
bütan gió di béi baslòt
vüna mi, vüna tì,
lüna, lüna tégnai tì.
U28 257Gatt vécc
végn da bass dal técc
cunt i urécc e portum via.
U29 265Vün: vidé,
dü: sentì,
tri: güstaa,
quatar: tucà,
cinc: udurà.
U30 268Ratìn bèl
indua sét stai?
Dala mia nunina.
Cusè la ta dai?
Mica e furmai.
U31 269Grin, grin graia,
Martin sóta la paia,
paia paiüsc
Tütt in crüsc!
U32 270Chésto l'è marc,
chésto l'è marc...
chésto chi l'a mangià
la carna dal böcc.
U33 226Tròta tròta cavalòt
sü pai sélvi, gió pai mòt,
bon pan, bon vin
fa trotà ul mè cavalin.
Ul cavalin l'è senza sèla
fa trutà Pulicinèla.
Pulicinèla l'a taià un did
pissigh sü che l'è guarì.
Pulicinèla l'è sénza cua
marcia sü e va a cà tua.
U34 114Grin grin graia
sóta la paia,
sóta al paiun
grin grun.
U35 119Bala d'òr,
bala d'argént,
se la va in tèra
la var niént.
Se la va in ciél
la var quéicòss,
se la va in dala pèll dal gòss
la var la pèll di péé dal préstinéé.

gioco con la palla
 X=X
X00 012Mi g'aveva un üselin
bianc e róss e vérdisin.
Al sütava a cipì
al sturniva nòcc e dì.
Na matina malédéta
trövi vèrta la capiéta
Guardi in gir,
guardi in gir,
trövi ul gatt
che al sa léca i barbis.
O canaia d'un gatin,
o canaia d'un gatin,
ciapi la scua,
ciapi la scua,
ta fu fa una brüta fin.
X00 040Trii par sèt vintün,
düü e dés pérün.
Al martedì al fa la lüna.
X00 055La piang, la rid
la spusa di furmigh.
X00 115O Chichina gh'è fö généé
i mè mérlott inn béi lévéé.
Farù piöv, farù fiucà,
i tò mérlòtt farù crépà.
X00 129A cà mia fu cumè ma möd,
cul bufétt a pizi ul fögh
cul sédélin a mungi i vach
cul trapulin a ciapi i ratt.
X00 140I cavaléé i van al bósch
fai da föia da murun.
X00 163Pan d'un dì
....
furmacc d'un ann,
vin da trii ann
e una tusa da désdòtt ann.
X00 172Una dòna sénza tétt
nè l'è cabra nè l'è bécch.
X00 173Un puu pérügn
al fa maa a nisügn.
X00 195A gh'è una végia:
la gh'a un dénc sól
e la fa cur tüta la gént.
X00 197Che ròba l'è mai quésta
a lassàa fö i gént biót ala finèstra.
Quést chi l'è un tegnimént
che i gént biót van tiraa dént.
X00 211Eviva nüm e piü nisün
e se em ciapà la cióca
l'ém pagada nüm.
X00 274O Signur di póaritt
quéll di sciuri al gh'a i curnitt,
quéll di prèvat l'è dispéràa
quéll di mónigh l'è scapàa.
X00 276Rótó mastèll
vérmastich, toch.
 
z00 255Intant che lü l'è sü che 'l dòrma
mi sum chi a ninà la cüna,
quésta chi l'è la furtüna
che g'a i donn a tö marì.
z02 262fa la nana pupìn pupéta
che la tò nona la fa calzéta
la tò mam la fa la büséca
ul tò pà al bév ul vin
fa la nana bèl tusin.